ఈ పాటను ఘంటసాల, జిక్కీ పాడగా మొట్టమొదట 'ఒ హొ హొ ఒహొ ' అంటూ వచ్చే ఆలాపన కె.రాణిది.  యమన్ రాగచ్చాయలతో సాగిన ఈ పాట చరణాల ముందు వచ్చే ఇంటర్లూడ్ లలో వినిపించే హవాయిన్ గిటార్ నేరుగా మనసునే మీటినంత హాయిగా ఉంటుంది. ఈ పాట సాహిత్యాన్ని ఆసాంతం రెండు మూడుసార్లు గమనిస్తే - దేవదాసు, పార్వతి పాత్రల మనస్తత్వాన్ని, ఒకరిపై ఒకరికి గల అభిప్రాయాన్ని - వీలయినంత క్లుప్తంగా సగటు ప్రేక్షకునికి కూడా  అర్ధమయ్యే సామాన్య భాషలో చెబుతూనే - వారి పాత్రలు విడిపోతాయి అనే విషయాన్ని-  అన్యాపదేశంగా హెచ్చరిస్తున్నట్లు వుంటుంది.