'ఓ చందమామ అందాల భామ' పాటను ఘంటసాల గానం చేశారు. చివర్న జిక్కి హమ్మింగ్ ఉంటుంది. ఉదయ రవిచంద్రిక రాగంలో అప్పుడప్పుడు 'రి' అన్న స్వరాన్ని చేరుస్తూ పాటకు కొత్త సొగసుని, సోయగాన్ని చేకూరుస్తూ అందిలో మెదిలే మధురానందాన్ని అందించగలిగేది తానేనని అనిపించేటంత మృదువుగా ఘంటసాల పాడిన తీరు - తరాలు మారినా అదే అనుభూతిని చెక్కు చెదరకుండా అందజేస్తుంది. కావాలంటే ఈ సినిమా ఆడియో సంపాదించి ఈ పాటను వినగాని, పాడుకుని గాని చూడండి. పాట ఎంత నిత్యనూతనంగా ఉందో అనుభవపూర్వకంగా తెలుస్తుంది. ఈ పాటను తెరపై ఎన్.టి.ఆర్, అంజలీదేవి అభినయించారు.