2013 ఏప్రిల్ 14 న కన్నుమూసిన మృదు మధుర గాయకుడు, సంగీత సాహిత్యాలలో అద్భుతమైన జ్ఞానం కలిగిన పి.బి. శ్రీనివాస్ గారంటే నాకెంతో గౌరవం. నేనంటే ఆయనకెంతో ఇష్టం. ఆయన హైదరాబాద్ వచ్చినప్పుడు కలవకపొతే - పేరుకి రాజా, కానీ ఒట్టి దొంగవి - అని చిన్న సైజు అలక చూపేవారు. నేను ఏది అడిగినా కాదనేవారు కాదు. ఓ సారి బాలమురళి గారిని ఇంటర్ వ్యూ చేయడానికి మా టీవీ నన్ను చెన్నైకి పంపించింది. ఒరిజినల్ ప్లాన్ మూడు రోజులు. మధ్యలో అనుకోని బ్రేక్ వచ్చింది. బాలమురళి గారి ఇంటి పక్కన రిపేర్లు వుండడం రోజంతా కరెంట్ వుండదన్నారు. ఊరికే కూచోవడం కన్నా ఏదైనా ఓ ఎపిసోడ్ చేస్తే వర్కవుట్ అవుతుందనిపించింది. వెంటనే పీబీ శ్రీనివాస్ మనసులో మెదిలారు. తర్వాతి నెలలో ఆయనకు 80 ఎళ్ళు పూర్తవుతాయని గుర్తొచ్చింది. ఫోన్ చేసి స్పెషల్ ఇంటర్ వ్యూ కావాలి, షూటింగ్ చేసుకోవడానికి ప్లేస్ కూడా కావాలి అని అడిగాను. "మా అబ్బాయి ఇంట్లో కార్పెంటరీ వర్క్ చేయిస్తున్నాడు. నువ్వెక్కడికి రమ్మంటే అక్కడికి వస్తాను" అన్నారు పీబీ.